قطر میں مذاکرات شروع ہونے کے بعد اسرائیل کے غزہ پر حملوں میں شدت

قطر : قطر میں مذاکرات کے آغاز کے ساتھ ہی اسرائیل نے غزہ پر اپنی بمباری تیز کر دی ہے۔ عرب میڈیا کے مطابق، اسرائیلی فوج کی غزہ میں تازہ بمباری کے دوران ایک ہی دن میں کم از کم 88 فلسطینی شہید اور 208 زخمی ہو گئے۔ صرف تین دن میں اسرائیلی فوج نے 100 سے زائد حملے کیے، جن میں شمال مغربی غزہ میں اسرائیلی ڈرون حملوں کے نتیجے میں کئی فلسطینی زخمی ہوئے۔

مزید تفصیلات کے مطابق، رفاہ میں اسرائیلی بمباری میں 6 فلسطینی شہید اور کئی زخمی ہوئے۔ اسرائیلی فورسز کے حملوں میں اب تک 45,805 فلسطینی شہید اور 1 لاکھ 9 ہزار 64 زخمی ہو چکے ہیں۔

اس کے علاوہ حماس کے رہنما باسم نعیم نے قطر میں اسرائیل کے وزیر دفاع اسرائیل کاٹز کے ساتھ حماس کے بالواسطہ مذاکرات دوبارہ شروع ہونے کی تصدیق کی ہے۔ ان کا کہنا تھا کہ معاہدے کے لیے ضروری ہے کہ اسرائیلی فوج غزہ سے انخلا کرے اور بے گھر فلسطینی اپنے گھروں کو واپس جائیں۔