پاکستان اور جنوبی افریقہ کے درمیان دوسرے ٹیسٹ کا تیسرا روز: پاکستان کی بیٹنگ جاری

کیپ ٹاؤن :جنوبی افریقہ کے خلاف دوسرے ٹیسٹ کے تیسرے روز پاکستان کی بیٹنگ کا آغاز ہو چکا ہے۔ بابر اعظم 31 اور محمد رضوان 9 رنز کے ساتھ کھیلنے کے لیے موجود ہیں۔

جنوبی افریقہ کی ٹیم نے اپنی پہلی اننگز میں 615 رنز بنائے تھے، جس کے جواب میں پاکستان کا آغاز مایوس کن رہا۔ شان مسعود 2 رنز بنا کر کگیسو ربادا کی گیند پر آؤٹ ہوئے، اور کامران غلام 12 رنز بنا کر مارکو یانسین کی گیند پر بولڈ ہو گئے۔ سعود شکیل بھی بغیر کسی رن کے 20 کے مجموعے پر ربادا کا شکار بنے۔

دوسرے دن جنوبی افریقہ نے 316 رنز پر 4 وکٹوں کے ساتھ کھیل کا آغاز کیا اور جلد ہی پانچویں وکٹ بھی گر گئی جب ڈیوڈ بیڈنگھم 5 رنز پر محمد عباس کی گیند پر آؤٹ ہوئے۔ ریان ریکلٹن نے 266 گیندوں پر ڈبل سنچری مکمل کی، اور ان کی 148 رنز کی پارٹنرشپ کائل ویریانے کے ساتھ چھٹی وکٹ پر بنی۔

ویریانے 100 رنز بنا کر آؤٹ ہوئے۔ ریکلٹن اور مارکو یانسین کے درمیان ساتویں وکٹ پر 86 رنز کی شراکت بھی ہوئی، تاہم ریکلٹن 259 رنز پر کیچ آؤٹ ہو گئے۔ جنوبی افریقا کی ٹیم 615 رنز پر آؤٹ ہوئی، جہاں مارکو یانسین نے 62 اور کیشو مہارات نے 40 رنز بنائے۔ پاکستان کی جانب سے محمد عباس اور سلمان علی آغا نے 3،3 وکٹیں حاصل کیں، جب کہ میر حمزہ اور خرم شہزاد نے 2،2 وکٹیں لیں۔