برطانیہ میں شدید برف باری، نقصان کا خدشہ ، الرٹ جاری

لندن : برطانیہ میں شدید برف باری اور بارش کے باعث میٹ آفس نے بڑے نقصان کا الرٹ جاری کر دیا ہے۔ میٹ آفس کے مطابق، لندن میں سڑکوں پر ٹریفک کی روانی متاثر ہوئی ہے اور ریلوے و فضائی سفر میں تاخیر یا منسوخی کا امکان ہے۔ مزید 30 سینٹی میٹر تک برف باری کی پیش گوئی کی جا رہی ہے، اور دیہی علاقوں میں بجلی کی فراہمی بھی متاثر ہو سکتی ہے۔

میٹ آفس نے یہ بھی بتایا کہ سکاٹ لینڈ کے دیہی علاقوں میں درجہ حرارت منفی 10 ڈگری تک پہنچ سکتا ہے، جب کہ چیشائر اور سومر سیٹ میں درجہ حرارت منفی 5 ڈگری تک گر چکا ہے۔ برف باری کے باعث لنکن شائر میں ایک حادثے میں 7 ماہ کے بچے کی موت کی بھی خبر آئی ہے۔

جنوبی انگلینڈ کی مقامی حکومتوں نے موسمی حالات کے پیش نظر ہنگامی اقدامات اٹھا لیے ہیں تاکہ شہریوں کو کسی بھی قسم کے نقصان سے بچایا جا سکے۔