کرم میں ڈی سی پر حملہ کرنے والے پانچ ملزمان کی شناخت ہوگئی

کرم:  کرم میں ڈپٹی کمشنر پر حملہ کرنے والے پانچ افراد کی شناخت کر لی گئی ہے۔ حکام کے مطابق، خیبر پختونخوا حکومت نے ان ملزمان اور ان کے معاونین کو فوری طور پر گرفتار کرنے کا فیصلہ کیا ہے، اور دہشت گردوں کے سروں کی قیمت بھی مقرر کرنے کا اعلان کیا گیا ہے۔

اس سے قبل وزیراعلیٰ علی امین گنڈاپور کی زیر صدارت کرم کی صورتحال پر ایک ہنگامی اجلاس ہوا، جس میں چیف سیکرٹری، آئی جی خیبر پختونخوا اور دیگر حکام نے شرکت کی۔ اجلاس میں فیصلہ کیا گیا کہ امن معاہدے کی خلاف ورزی کرنے والے مقامی افراد کو ذمہ دار ٹھہرایا جائے گا، اور فائرنگ کے واقعے میں ملوث افراد کے خلاف فوری طور پر ایف آئی آر درج کر کے انہیں گرفتار کیا جائے گا۔

اجلاس میں دہشت گردوں کے خلاف بھرپور کارروائی کرنے کا عزم ظاہر کیا گیا، اور کہا گیا کہ دہشت گردوں اور ان کے معاونین سے کوئی رعایت نہیں کی جائے گی۔ یہ واقعہ لوئر کرم کے علاقے بگن میں پیش آیا، جہاں نامعلوم حملہ آوروں کی فائرنگ سے ڈی سی کرم سمیت سات افراد زخمی ہو گئے تھے۔ اس کے بعد کرم میں کھانے پینے کا سامان لے کر جانے والے قافلے کو روک دیا گیا تھا۔