جو بھی رشتہ آتا ہے، سب سے پہلے اداکاری چھوڑنے کا مطالبہ کیا جاتا ہے: یشما گل

لاہور: معروف پاکستانی اداکارہ یشما گل نے انکشاف کیا ہے کہ اب تک جو بھی رشتہ آیا ہے، اس میں سب سے پہلے ان سے یہ مطالبہ کیا گیا کہ وہ اداکاری چھوڑ دیں۔

یشما گل حال ہی میں دنانیر مبین کے پروگرام میں شریک ہوئیں، جہاں انہوں نے شوبز کی دنیا اور اپنی ذاتی زندگی کے حوالے سے تفصیل سے بات کی۔ ایک سوال کے جواب میں یشما گل نے کہا کہ ان کے خاندان کی جانب سے کئی رشتہ آئے ہیں، لیکن ہر رشتہ میں سب سے پہلے یہ شرط رکھی گئی کہ وہ اداکاری کو خیر باد کہہ دیں۔

اداکارہ کا کہنا تھا کہ ان کے لیے اداکاری چھوڑنا انتہائی مشکل ہے کیونکہ یہی ان کی پہچان اور شوبز میں کامیابی کا باعث بنی ہے، اور وہ اس کا حصہ بن کر بہت خوش ہیں۔

دنانیر مبین نے یشما سے سوال کیا کہ اگر کسی شخص کی محبت میں گرفتار ہو جائیں اور وہ ان سے اداکاری چھوڑنے کا کہے، تو کیا وہ اس کی بات مان لیں گی؟ یشما گل نے جواب دیتے ہوئے کہا کہ اگر وہ شخص سچا ہو اور ان سے کیے گئے وعدے پورے کرے، تو وہ اس کی محبت اور وعدے کی خاطر اداکاری چھوڑنے کے لیے تیار ہوں گی۔

اس وقت یشما گل اپنی بہن کی شادی کی تقریبات میں مصروف ہیں، اور ان کی شادی کی ویڈیوز سوشل میڈیا پر وائرل ہو رہی ہیں۔