ملک میں 10 سال سے زائد عمر کے بچوں کے لیے نیا ب فارم متعارف کرانے کا فیصلہ

اسلام آباد : پاکستان میں 10 سال سے زائد عمر کے بچوں کے لیے نیا ب فارم متعارف کرانے کا فیصلہ کیا گیا ہے، جو سکیورٹی فیچرز سے لیس ہوگا۔ وزارتِ داخلہ کے مطابق اس نئے ب فارم کا اجرا 15 جنوری سے مرحلہ وار شروع ہوگا۔

نادرا نے محکمہ پاسپورٹ کے ساتھ مل کر ب فارم میں بچوں کی انگلیوں کے نشانات اور تصاویر شامل کرنے کا فیصلہ کیا ہے۔ وزیرِ داخلہ محسن نقوی نے کہا کہ اس اقدام سے بچوں کی شناختی معلومات کی چوری اور غلط استعمال روکنے میں مدد ملے گی اور اس طرح بچوں کے جعلی شناختی کارڈز، غیر قانونی پاسپورٹ اور انسانی اسمگلنگ جیسے جرائم کی روک تھام کی جاسکے گی۔

پہلے مرحلے میں 15 جنوری سے 10 سال سے زائد اور 18 سال سے کم عمر بچوں کے انگلیوں کے نشانات اور تصاویر نادرا سینٹرز پر لیے جائیں گے۔ اس عمل کے دوران بچوں کے ساتھ والدین یا قانونی سرپرست کا آنا ضروری ہوگا اور انہیں کمپیوٹرائزڈ شناختی کارڈ اور بچے کا پیدائشی سرٹیفکیٹ بھی ساتھ لانا ہوگا۔ نادرا کی کارروائی کے بعد بچے کو اس کا نیا ب فارم جاری کیا جائے گا۔