عادل بازئی کی رکنیت بحال، الیکشن کمیشن نے نوٹیفکیشن جاری کر دیا

اسلام آباد : الیکشن کمیشن آف پاکستان  نے رکن قومی اسمبلی عادل بازئی کی رکنیت بحال کرتے ہوئے ان کا نوٹیفکیشن جاری کر دیا ہے۔ نوٹیفکیشن میں کہا گیا ہے کہ عادل بازئی کو مسلم لیگ (ن) کا رکن نہ سمجھا جائے، بلکہ انہیں آزاد امیدوار کے طور پر تسلیم کیا جائے۔

عادل بازئی کی رکنیت بحالی کا فیصلہ قومی اسمبلی کے حلقہ 262 کوئٹہ سے متعلق ہے، جہاں ان پر پارٹی پالیسی سے انحراف کا الزام تھا۔ خاص طور پر بجٹ اور 26 ویں آئینی ترمیم پر ان کے مؤقف کی وجہ سے مسلم لیگ (ن) نے ان کے خلاف کارروائی کی تھی۔ اس پر الیکشن کمیشن نے عادل بازئی کو نااہل قرار دے دیا تھا، لیکن سپریم کورٹ نے 9 دسمبر کو اس فیصلے کو معطل کرتے ہوئے ان کی رکنیت بحال کر دی۔

الیکشن کمیشن نے اپنے بیان میں کہا کہ عادل بازئی کے ڈی سیٹ ہونے کا نوٹیفکیشن سپریم کورٹ کے حتمی فیصلے تک معطل رہے گا۔