گوجرانوالہ میں ایف آئی اے کی کارروائی: انسانی سمگلنگ کے نیٹ ورک کے دو سرغنہ پکڑے گئے

گوجرانوالہ: ایف آئی اے نے گوجرانوالہ میں کارروائی کرتے ہوئے انسانی سمگلنگ میں ملوث دو ملزمان کو گرفتار کیا ہے۔

ایف آئی اے کے ترجمان کے مطابق، گوجرانوالہ زون کی ٹیم نے گجرات کے علاقے شادمان کالونی میں چھاپہ مارا اور ضیاءالرحمان اور اعجاز احمد نامی دو ملزمان کو گرفتار کیا۔ ملزمان نے پاکستان کے مختلف حصوں میں ایجنٹوں کے ذریعے شہریوں کو جعلی ویزے فراہم کیے تھے۔

ترجمان نے بتایا کہ ملزمان جعلی پاسپورٹس، ویزا سٹیکرز اور دیگر سفری دستاویزات تیار کرنے میں ملوث تھے اور ان جعلی دستاویزات کے ذریعے سادہ لوح شہریوں کو دھوکہ دیتے تھے۔ ملزمان بین الاقوامی انسانی سمگلنگ کے نیٹ ورک کا حصہ تھے۔

چھاپے کے دوران ملزمان کے قبضے سے 20 پاکستانی اور 31 غیر ملکی پاسپورٹس برآمد ہوئے، ساتھ ہی 95 جعلی اسٹامپس، بینک ڈیپازٹ سلپس، 13 جعلی رہائشی کارڈز، امیگریشن اسٹمپس، لیمینیشن شیٹس اور دیگر سفری دستاویزات بھی ضبط کر لی گئیں۔

ایف آئی اے کے مطابق، ملزمان کے قبضے سے چیمبر آف کامرس کے جعلی کارڈز، سٹوڈنٹ کارڈز، موبائل فونز، لیمینیشن مشینیں اور ٹائپنگ مشینیں بھی برآمد ہوئیں

حکام نے بتایا کہ ملزمان بھاری رقم لے کر شہریوں کو وزٹ ویزے یا عمرہ ویزے پر بیرون ملک بھیجنے کا وعدہ کرتے تھے، اور جعلی ویزا سٹیکرز کے ذریعے دبئی، آذربائیجان اور یورپ بھیجنے کی کوشش کرتے تھے۔

ڈائریکٹر ایف آئی اے گوجرانوالہ زون عبدالقادر قمر نے کہا کہ ملزمان کو گرفتار کر کے تفتیش کا آغاز کر دیا گیا ہے، اور دیگر ملزمان کی گرفتاری کے لیے چھاپے مارے جا رہے ہیں۔