دور اندیش وزیراعظم منموہن سنگھ کا انتقال، بھارت میں سوگ کی لہر

ممبئی: بھارت کے سابق وزیراعظم ڈاکٹر منموہن سنگھ 92 سال کی عمر میں انتقال کر گئے۔

ڈاکٹر منموہن سنگھ کی صحت گزشتہ کچھ دنوں سے خراب تھی، جس کے بعد انہیں دہلی کے آل انڈیا انسٹیٹیوٹ آف میڈیکل سائنسز (ایمس) اسپتال منتقل کیا گیا تھا۔ جہاں وہ طویل علاج کے باوجود زندگی کی جنگ ہار گئے۔

ڈاکٹر منموہن سنگھ نے 2004 سے 2014 تک بھارت کے وزیراعظم کے طور پر خدمات انجام دیں۔ ان کا شمار بھارت کے مایہ ناز اقتصادی ماہرین میں ہوتا تھا، اور ان کی قیادت میں بھارت نے اقتصادی ترقی کی نئی راہیں کھولیں۔ وزیر خزانہ کے طور پر ان کی خدمات کا بھی بڑا کردار تھا، اور انہیں بھارت کی اقتصادی اصلاحات کا معمار سمجھا جاتا ہے۔

منموہن سنگھ کی سیاسی زندگی میں اہم کردار تھا اور انہوں نے کئی اہم فیصلے کیے جن میں 1991 کی اقتصادی اصلاحات بھی شامل ہیں۔ وزیراعظم بننے سے پہلے وہ بھارت کے وزیر خزانہ اور فنانس سیکریٹری کے طور پر بھی خدمات انجام دے چکے تھے۔

منموہن سنگھ کا انتقال ملک کے لئے ایک بڑا نقصان ہے، اور ان کی خدمات ہمیشہ یاد رکھی جائیں گی۔