وزیراعلیٰ پنجاب کا کرسمس کے موقع پر سکیورٹی انتظامات مزید سخت کرنے کا حکم

لاہور: وزیراعلیٰ پنجاب مریم نواز شریف نے کرسمس کے موقع پر صوبے بھر میں سکیورٹی انتظامات مزید سخت کرنے کی ہدایت دے دی ہے۔

مریم نواز شریف نے گرجا گھروں میں ہونے والی دعائیہ تقریبات کی سکیورٹی میں مزید بہتری لانے کے لیے ضلعی انتظامیہ اور پولیس افسران کو اس کی نگرانی کرنے کا حکم دیا۔

انہوں نے لاہور اور دیگر بڑے شہروں میں گرجا گھروں کے ارد گرد پولیس اور سکیورٹی اہلکاروں کی نفری بڑھانے کی ہدایت کی اور کرسمس تقریبات کے دوران ٹریفک مینجمنٹ کے انتظامات کو بہتر بنانے کے لیے بھی ہدایات جاری کیں۔

وزیراعلیٰ پنجاب نے پولیس میثاق سینٹر میں مسیحی برادری کے ساتھ کیک کاٹ کر اظہار یکجہتی کرنے کا فیصلہ کیا اور مسیحی برادری کے لیے سستے بازاروں میں خصوصی ڈسکاؤنٹس دینے کی ہدایت بھی کی۔

مریم نواز شریف نے کہا کہ مسیحی برادری کی سکیورٹی میں کسی بھی قسم کی غفلت برداشت نہیں کی جائے گی، اور گرجا گھروں کے اطراف صفائی کے انتظامات کو بہتر بنانے کے لیے متعلقہ محکموں کو ضروری ہدایات دے دی گئی ہیں۔