برطانیہ میں کزن میرج پر پابندی عائد کرنے کا بل آج پارلیمنٹ میں پیش ہوگا

لندن: برطانیہ میں فرسٹ کزنز کے درمیان شادی پر پابندی عائد کرنے کے لیے ایک مجوزہ بل آج پارلیمنٹ میں پیش کیا جائے گا۔ اس بل کی منظوری کے بعد، برطانیہ میں چچا، پھوپھی، خالہ اور ماموں زاد بہن بھائیوں کی شادی غیر قانونی قرار پائے گی۔

موجودہ برطانوی قوانین کے تحت، میرج ایکٹ 1949 کے مطابق بہن بھائیوں کی شادی یا والد کی بیٹی سے شادی غیر قانونی ہے، جبکہ جنسی جرائم کا ایکٹ 2003 میں خاندان کے بعض افراد کے ساتھ جنسی تعلقات کو جرم قرار دیا گیا ہے۔ تاہم، ان قوانین میں فرسٹ کزنز کو شامل نہیں کیا گیا۔

بل پیش کرنے والے رکن اسمبلی رچرڈ بولڈن نے کہا کہ فرسٹ کزن میرج کے نتیجے میں جینیاتی بیماریوں کی شرح میں اضافہ ہوتا ہے، جس سے بچوں میں پیدائشی نقائص، پری ٹرم ڈیلیوری، تھیلیسیمیا، مرگی، گونگا پن اور بائی پولر ڈس آرڈر جیسے مسائل پیدا ہو سکتے ہیں۔ طبی ماہرین کے مطابق، کزن میرج کے نتیجے میں بچوں کی صحت پر سنگین اثرات مرتب ہونے کے امکانات بڑھ جاتے ہیں۔