پنجاب کے سرکاری سکولوں میں موبائل فون پر پابندی، نئے ڈسپلن قواعد کا نفاذ

لاہور: محکمہ سکول ایجوکیشن نے پنجاب بھر کے سرکاری سکولوں میں موبائل فون کے استعمال پر پابندی عائد کر دی ہے۔ اس پابندی کے ساتھ ساتھ 20 نکاتی گائیڈ لائنز بھی جاری کی گئی ہیں جن کا مقصد تدریسی نظام کی بہتری اور سکولوں میں ڈسپلن کو برقرار رکھنا ہے۔ ان گائیڈ لائنز پر عملدرآمد کے لیے تمام ضلعی اور تحصیل ایجوکیشن افسران اور سکول سربراہان کو ہدایت نامہ جاری کیاگیا ہے۔
نئی گائیڈ لائنز کے مطابق ساتذہ کے لیے ڈریس کوڈ میں تبدیلی کی گئی ہے، اور انہیں ڈریس کوٹ اور بند جوتے پہننا ضروری ہو گا۔ اساتذہ اور طلبہ کو اپنے نام کا بیج بھی لگانا ہوگا تاکہ شناخت میں آسانی ہو۔

گائیڈ لائنز میں سکول کے عمومی ماحول کو بہتر بنانے کے لیے مزید اقدامات بھی شامل کیے گئے ہیں۔ سکولوں میں سب نیوی بلیو جرسی اور طلبہ یونیفارم کی پابندی ہو گی، اور سکول کے مرکزی گیٹ پر اوقات کار کا بورڈ آویزاں کیا جائے گا۔ ہر کلاس میں کلاس رپریزنٹیٹو (سی آر) مقرر کیا جائے گا، اور سکول میں مثبت پیغامات کی تشہیر کے لیے تین یا چار پینا فلیکس لگائے جائیں گے۔

اس کے علاوہ، طلبہ کے ناخن اور بالوں کی روزانہ بنیادوں پر چیکنگ کی جائے گی تاکہ سکول کے ڈسپلن کو مزید مستحکم کیا جا سکے۔ اساتذہ کے لیے گھڑی پہننا بھی لازمی قرار دیا گیا ہے۔ اسمبلی میں ہیڈ ٹیچر اور تمام اساتذہ کی حاضری یقینی بنائی جائے گی۔