شامی باغیوں کا دمشق پر قبضے کے بعد قیدیوں کے لیے عام معافی کا اعلان

دمشق: شامی باغیوں نے دارالحکومت دمشق پر قبضہ کرنے کے بعد سرکاری ٹی وی پر خطاب کرتے ہوئے بشار الاسد کی حکومت کے طویل دور کا خاتمہ کرنے کا اعلان کیا۔ انہوں نے اپنے خطاب میں تمام قیدیوں کے لیے عام معافی کا اعلان کیا اور کہا کہ دمشق میں حالات اب مکمل طور پر محفوظ ہیں، اور کسی بھی قسم کی کوئی  انتقامی کارروائی نہیں کی جائے گی۔

باغیوں نے آزاد شام کی خود مختاری اور سالمیت کے تحفظ کا عہد کرتے ہوئے کہا کہ شام میں سیاہ دور کا خاتمہ ہو چکا ہے، اور اب ملک میں ایک نیا دور شروع ہو رہا ہے۔ انہوں نے مزید کہا کہ ملک کی تمام سرکاری اور غیر سرکاری املاک کا تحفظ کیا جائے گا۔تحریر الشام کے رہنما ابو محمد الجولانی نے عوام اور سابق فوجیوں کو ہدایت دی کہ وہ سرکاری اداروں سے دور رہیں، کیونکہ اقتدار کی منتقلی تک ان اداروں کی سربراہی سابق وزیراعظم محمد غازی الجلالی کے ہاتھ میں ہو گی۔