جنگ بندی کی خلاف ورزیاں جاری , حزب اللہ کا اسرائیل پر جوابی حملہ

بیروت: اسرائیلی فوج کی جانب سے جنوبی لبنان میں جنگ بندی معاہدے کی بار بار خلاف ورزیوں کے بعد، لبنانی مزاحمتی گروپ حزب اللہ نے اسرائیل پر جوابی حملہ کیا ہے۔ حزب اللہ نے اپنے بیان میں کہا کہ اس نے اسرائیل کی خلاف ورزیوں کا جواب دیتے ہوئے کفر شوبا میں ایک اسرائیلی فوجی اڈے پر حملہ کیا، جو ایک تنبیہہ تھا۔

عرب میڈیا کے مطابق، 27 نومبر کو شروع ہونے والی جنگ بندی کے بعد سے اسرائیل نے لبنان پر 20 سے زائد حملے کیے ہیں، جس کے نتیجے میں کئی لبنانی شہری ہلاک اور زخمی ہوئے ہیں۔ یہ پہلا موقع ہے جب حزب اللہ نے اسرائیلی حملوں کا براہ راست جواب دیا ہے، جس سے جنگ بندی کے جاری رہنے کے امکانات پر سوالات اٹھنے لگے ہیں۔

حزب اللہ نے اسرائیل کی جانب سے لبنان کی فضائی حدود کی خلاف ورزیوں کا بھی ذکر کیا اور الزام عائد کیا کہ جنگ بندی کی نگرانی کرنے والی اتھارٹیز اسرائیلی حملوں کو روکنے میں ناکام رہی ہیں۔

یاد رہے کہ جنگ بندی معاہدے کے تحت ایک بین الاقوامی کمیٹی کو اس بات کی نگرانی کرنے کی ذمہ داری سونپی گئی تھی کہ دونوں فریقین معاہدے کی خلاف ورزی نہ کریں، لیکن اسرائیلی حملوں کے بعد اس معاہدے کی کامیابی پر سوالات اٹھنے لگے ہیں۔