ممبئی: ایئر انڈیا کی خاتون پائلٹ کی خودکشی، بوائے فرینڈ گرفتار

ممبئی :ممبئی میں ایئر انڈیا کی 25 سالہ خاتون پائلٹ سریشتی تولی نے خودکشی کر لی، جس کے بعد پولیس نے ان کے بوائے فرینڈ آدتیہ پنڈت کو خودکشی کی جانب اکسانے کے الزام میں گرفتار کر لیا ہے۔

رپورٹس کے مطابق، سریشتی تولی اتر پردیش سے تعلق رکھتی تھیں اور جون 2023 سے ممبئی کے مرول علاقے میں رہائش پذیر تھیں۔ ان کے رشتہ داروں نے الزام لگایا کہ ان کے بوائے فرینڈ آدتیہ پنڈت نے انہیں ہراساں کیا تھا اور نان ویجیٹیرین کھانا نہ کھانے کا دباؤ ڈالا تھا۔

پولیس کا کہنا ہے کہ سریشتی اور آدتیہ کی ملاقات دو سال قبل دہلی میں کمرشل پائلٹ کورس کے دوران ہوئی تھی اور اس کے بعد ان کے درمیان تعلقات قائم ہوئے۔

یہ واقعہ اس وقت سامنے آیا جب سریشتی نے آدتیہ کو فون کر کے بتایا کہ وہ اپنی زندگی کا خاتمہ کرنے جا رہی ہیں۔ آدتیہ فوری طور پر ممبئی پہنچا، لیکن جب اس نے فلیٹ کا دروازہ کھولا تو سریشتی کی لاش پنکھے سے لٹکی ہوئی تھی۔ انہیں فوری طور پر اسپتال لے جایا گیا، جہاں انہیں مردہ قرار دے دیا گیا۔

پولیس نے تحقیقات شروع کر دی ہیں اور آدتیہ پنڈت کو حراست میں لے لیا ہے۔