خامنہ ای نے اسرائیل پر حملے کی تیاری کا حکم دےدیا

تہران:  ایران کے سپریم لیڈر آیت اللہ خامنہ ای نے ملکی فورسز کو اسرائیل پر حملے کی تیاری کرنے کی ہدایت کی ہے۔ انہوں نے ایک اجتماع سے خطاب کرتے ہوئے کہا کہ اسرائیل اور امریکا کے خلاف کسی بھی اقدام کا سخت جواب دیا جائے گا۔

امریکی میڈیا نے دعویٰ کیا ہے کہ ایران 5 نومبر کو اسرائیل پر حملہ کر سکتا ہے۔ اس کے جواب میں، امریکا نے ایران کو متنبہ کیا ہے کہ اگر وہ دوبارہ حملہ کرتا ہے تو وہ اسرائیل کی دفاعی کارروائی میں مداخلت نہیں کرے گا۔

یاد رہے کہ یکم اکتوبر کو ایران نے اسرائیل کے خلاف 400 سے زائد بیلسٹک میزائل داغے تھے، جسے پاسداران انقلاب نے حماس کے رہنما اسماعیل ہنیہ اور حزب اللہ کے سیکرٹری جنرل حسن نصراللہ کے حملوں کا بدلہ قرار دیا تھا۔

پاسداران انقلاب نے مزید کہا کہ اگر اسرائیل نے ان کے آپریشن پر فوجی جواب دیا تو اسے زیادہ شدید اور تباہ کن حملوں کا سامنا کرنا پڑے گا۔ اس کے بعد، اسرائیل نے 26 اکتوبر کو تہران، شیراز اور کرج پر فضائی حملے کیے تھے۔