قطر پاکستان میں 3 ارب ڈالر کی سرمایہ کاری کا اعلان، وزیر اعظم کے دورے کے مثبت اثرات کا آغاز

اسلام آباد:حکومت پاکستان نے خوشخبری دی ہے کہ قطر نے پاکستان میں 3 ارب ڈالر کی سرمایہ کاری کرنے کا ارادہ ظاہر کیا ہے۔ یہ فیصلہ وزیر اعظم کے حالیہ دورہ قطر کے مثبت نتائج کے طور پر سامنے آیا ہے، جس کا ایک مشترکہ اعلامیہ بھی جاری کیا گیا ہے۔

اعلامیہ میں کہا گیا ہے کہ پاکستان اور قطر کے درمیان دوطرفہ تعلقات کو مزید مستحکم کرنے کا عزم کیا گیا ہے۔ دونوں ممالک موجودہ تعاون کو بڑھانے کے لیے متفق ہیں۔

وزیر اعظم نے اپنے دورے کے دوران پاکستان میں اہم اقتصادی شعبوں میں سرمایہ کاری کے مواقع کو اجاگر کیا، جس میں توانائی، مائنز اینڈ منرلز، اور آئی ٹی شامل ہیں۔

امیر قطر نے اقتصادی شراکت داری میں اضافہ، تجارتی تبادلے کو فروغ دینے، اور سرمایہ کاری میں دلچسپی کا اظہار کیا ہے۔

وفاقی وزیر اطلاعات عطا اللہ تارڑ نے کہا کہ قطر توانائی، معدنیات اور آئی ٹی کے شعبوں میں سرمایہ کاری کرے گا۔ انہوں نے یہ بھی بتایا کہ سعودی عرب کی معروف فاسٹ فوڈ چین بھی پاکستان میں اپنی شاخیں کھولنے کی منصوبہ بندی کر رہی ہے۔

وزیر اطلاعات نے یہ بھی ذکر کیا کہ سعودی عرب کی سرمایہ کاری 2.2 ارب ڈالر سے بڑھ کر 2.8 ارب ڈالر ہو گئی ہے، اور معاہدوں کی تعداد 27 سے بڑھ کر 34 ہو گئی ہے۔

عطا اللہ تارڑ نے کہا کہ پاکستان اقتصادی اصلاحات کے مرحلے سے آگے بڑھ چکا ہے اور اب معاشی استحکام کی طرف گامزن ہے۔ انہوں نے یہ بھی بتایا کہ پاکستان 24 سال بعد پہلی بار فیسک سرپلس میں داخل ہوا ہے۔
یہ پیش رفت پاکستان کے اقتصادی مستقبل کے لیے ایک مثبت علامت ہے اور دونوں ممالک کے درمیان تعلقات میں مزید مضبوطی کی امید ظاہر کرتی ہے۔