وزیراعلی خیبرپختون خوا گالی سے اب گولی پر آگئے ہیں اس سے وہ اپنا نقصان کریں گے: عطاء اللہ تارڑ

اسلام آباد:وفاقی وزیر اطلاعات عطاءاللہ تارڑ کا کہنا ہے کہ وزیراعلی خیبرپختون خوا گالی سے اب گولی پر آگئے ہیں اس سے وہ اپنا نقصان کریں گے کسی اور کا نہیں۔

؎

عطاءاللہ تارڑ نے وزیراعلی خیبرپختون خوا کے گولی چلانے کے بیان پر ردعمل دیتے ہوئے کہا ہے کہ   گولی چلانے اور لاشیں گرانے کا وزیراعلی خیبرپختون خوا کا بیان ان کی اپنی ناکامی کا اعتراف ہے کہ وہ کے پی حکومت چلانے کے قابل نہیں ۔

انہوں نے کہا کہ  وزیراعلی خیبرپختون خوا گالی سے اب گولی پر آگئے ہیں، اس سے وہ اپنا نقصان کریں گے، کسی اور کا نہیں ، پی ٹی آئی کی صوبائی حکومت کا کوئی بیان، کوئی اقدام اور کوئی رویہ جمہوری، سیاسی اور پارلیمانی نہیں ، اِنہوں نے کبھی نہیں کہاکہ ہم تعلیم، صحت، روزگار، معاشی بہتری کے میدانوں میں مقابلہ کریں گے ۔

عطاء اللہ تارڑ نے کہا کہ   انقلاب لانا ہے تو صحت، تعلیم اور عوام کی فلاح بہبود کے منصوبوں کا انقلاب لائیں، کے پی میں کرپشن اور نا اہلی کی انتہا ہو چکی، اصل مقابلہ یہ تھا کہ  وفاق اور پنجاب کی طرح بجلی کے صارفین کو خیبرپختون خوا حکومت اپنے صوبے میں کوئی ریلیف دیتی ، اصل مقابلہ یہ تھا کہ ہسپتال، درس گاہوں کی تعمیر سے عوام کی خدمت کا کوئی ریکارڈ بناتے۔

وزیر اطلاعات نے کہا کہ  صدر شی جن پنگ کے دورے کو دھرنوں سے ناکام بنانے والے اب ایس سی او کے اجلاس کے موقع پر پھر فساد مچانا چاہتے ہیں ، پاکستان کو ڈیفالٹ کے کنارے پہنچانے والی پی ٹی آئی کو تکلیف ہے کہ پاکستان معاشی بحالی کی راہ پر کیوں چل پڑا ہے ،   عوام کو تیز ترین مہنگائی سے تکلیف دینے والوں کو تکلیف ہے کہ مہنگائی 32 فی صد سے 9.6 فی صد پر کیوں آگئی ہے ۔

عطاء اللہ تارڑ نے کہا کہ  گالی ، گولی اور بندوق سے مہنگائی کم ہوگی نہ بیروزگاری، گیارہ سال سے خیبرپختون خوا پی ٹی آئی کی لوٹ مار کا اڈہ بنا ہوا ہے ، وزیراعظم شہبازشریف نے فسلطینیوں کی حمایت کی اور اسرائیل کو للکارا، پاکستان میں اسرائیلی ایجنٹوں کو اس پر تکلیف ہوگئی ہے۔