پاکستان اور بنگلادیش کے درمیان دوسرا ٹیسٹ آج شروع ہوگا، بارش کے باعث ٹاس تاخیر کا شکار

راولپنڈی:پاکستان اور بنگلادیش کے درمیان دوسرا ٹیسٹ میچ آ ج سے راولپنڈی کرکٹ سٹیڈیم میں شروع ہو گا ۔

شیڈول کے مطابق ٹاس ساڑھے نو بجے شروع ہونا تھا  جو کہ بارش کی وجہ سے  تاخیر کا شکار  ہوا ہے ، بارش کے باعث راولپنڈی کرکٹ سٹیڈیم کی بیشتر آؤٹ فیلڈ پر پانی جمع ہو گیا ہے۔

سٹیڈیم انتظامیہ کے مطابق بارش کے باعث  پچ کو مکمل ڈھانپ دیا گیاہے اوربارش رکنے پر  پچ کی تیاری کے لیے رولر  استعمال کیا جائےگا۔

جڑواں شہروں راولپنڈی و اسلام آباد میں صبح سے وقفے وقفے سے بارش کا سلسلہ جاری ہے، اور محکمہ موسمیات کی جانب سے ٹیسٹ میچ کے  پہلے روز دوپہر تک بادلوں کے برسنے کی پیشگوئی کی گئی ہے۔

واضح رہے کہ دو ٹیسٹ میچوں کی سیریز کے پہلے میچ میں بنگلا دیش نے پاکستان کو 10 وکٹوں سے شکست دی تھی، سیریز میں بنگلا دیش کو  0-1 کی برتری حاصل ہے۔