ٹی ٹوینٹی ورلڈ کپ، آسٹریلیا نے سکاٹ لینڈ کو 5 وکٹوں سے شکست دے دی

انٹیگوا: آسٹریلیا نے سکاٹ لینڈ کو 5 وکٹوں سے شکست دے دی۔ آئی سی سی ٹی ٹوئنٹی ورلڈ کپ 2024ء کے میچ میں آسٹریلیا نے سکاٹ لینڈ کو 5 وکٹوں سے ہرا دیا۔

امریکہ اور ویسٹ انڈیز کی میزبانی میں ہونے والے ٹی ٹوینٹی ورلڈ کپ کے 35 ویں میچ میں آسٹریلیا نے ٹاس جیت کر سکاٹ لینڈ کو بیٹنگ کرنے کی دعوت دی، دونوں ٹیمیں ڈیرن سیمی نیشنل کرکٹ سٹیڈیم میں مدمقابل ہوئیں۔

آسٹریلیا نے 181 رنز کا ہدف آخری اوور میں حاصل کر لیا، آسٹریلیا کی جانب سے ڈیوڈ وارنر1، مچل مارش 8 اور گلین میکسویل11 رنز بنا کر پویلین لوٹے، ٹریوس ہیڈ 68 اور مارکس اسٹوئنس نے 59 رنز کی اننگ کھیلی۔
آسٹریلیا کی جیت کے ساتھ ہی انگلینڈ کی ٹیم نے سپر 8 کیلئے کوالیفائی کر لیا، آسٹریلیا کی ٹیم پہلے ہی سپر 8 کیلئے کوالیفائی کر چکی ہے۔

قبل ازیں آسٹریلیا کی دعوت پر سکاٹش ٹیم نے بیٹنگ کا آغاز کیا جو اچھا ثابت نہ ہوا، پہلے اوور میں ہی 3 کے مجموعی سکور پر اوپنر مائیکل الیگزینڈر جونز اگر کی بال پر کلین بولڈ ہو گئے، ان کے بعد آنے والے برینڈن مکمولن نے جارج منسی کے ساتھ ملکر آسٹریلوی باؤلرز کی خوب درگت بنائی۔

برینڈن مکمولن نے 34 بالز پر 60 رنز کی شاندار اننگز کھیلی اور زیمپا کی گیند پر سٹارک کو کیچ دے بیٹھے، رچرڈ برنگٹن 42، جارج منسی 35 رنز بنا کر نمایاں رہے، میتھیو ہینری کروس 18، مائیکل الیگزینڈر لیکس 5 جبکہ کرس گریوز 8 رنز کیساتھ ناٹ آؤٹ رہے۔
سکاٹ لینڈ کی ٹیم نے مقرر 20 اوورز میں 5 وکٹوں کے نقصان پر 180 رنز بنائے، آسٹریلیا کی جانب سے گلین میکس ویل نے 2 کھلاڑیوں کو آؤٹ کیا، آشٹن اگر، ناتھن ایلیس اور ایڈم زیمپا نے ایک ایک وکٹ حاصل کی۔