اگلے وزیر اعظم بلاول بھٹوزرداری ہوں گے:سابق کرکٹر کی پیش گوئی

کراچی: پاکستان کی قومی کرکٹ ٹیم کے سابق وکٹ کیپر ذوالقرنین حیدر نے  پیش گوئی کی ہے کہ بلاول بھٹو زرداری بہترین سیاستدان ہونے کی وجہ سے اگلے وزیراعظم ہوں گے۔ذوالقرنین حیدر نے پاکستان پیپلز پارٹی میں شمولیت اختیار کر لی ہے۔

ذرائع کے مطابق ذوالقرنین حیدر نے پیپلز پارٹی سیکرٹریٹ کا دورہ کیا اور پارٹی میں شمولیت اختیار کر لی۔

یاد رہے کہ نومبر 2010 میں دبئی میں پاکستان اور جنوبی افریقہ کے درمیان ون ڈے سیریز کے دوران ذوالقرنین حیدر اچانک ٹیم کو چھوڑ کر لندن چلے گئے تھے۔

لندن پہنچنے کے بعد ذوالقرنین نے بتایا کہ انہیں اور ان کے اہل خانہ کو میچ فکسرز کی جانب سے جان سے مارنے کی دھمکیاں دی گئیں جس کے باعث انہیں قومی اسکواڈ چھوڑ کر لندن جانے پر مجبور کیا گیا۔

بعد ازاں ذوالقرنین اپریل میں سیکیورٹی کے وعدے کے بعد پاکستان واپس آئے تھے۔ پاکستان کرکٹ بورڈ نے انہیں صورتحال کا جائزہ لینے کے لیے ڈسپلنری کمیٹی کے سامنے پیش ہونے کے لیے طلب کیا۔

بعد ازاں ڈسپلنری کمیٹی کے سربراہ سلطان رانا نے ذوالقرنین کے ساتھ نیوز کانفرنس کرتے ہوئے کہا کہ وکٹ کیپر نے اپنی غلطی تسلیم کی، معافی مانگی اور بورڈ کے خلاف تمام شکایات واپس لے لیں۔

انہوں نے مزید کہا کہ ذوالقرنین کے حالات کو دیکھتے ہوئے کمیٹی نے کیس کو ہمدردی سے نمٹانے کا انتخاب کیا اور اس پر 5 لاکھ روپے جرمانہ عائد کیا۔

اس وقت سلطان رانا نے کہا تھا کہ ذوالقرنین حیدر کرکٹ میں واپس آ سکتے ہیں اور قومی ٹیم کے لیے کھیلنے کے اہل ہو سکتے ہیں تاہم ان کے رویے پر ایک سال تک نظر رکھی جائے گی۔

اس موقع پر ذوالقرنین کا کہنا تھا کہ دبئی میں قومی ٹیم کو چھوڑنا ان کی غلطی تھی اور انہیں اسی وقت ٹیم انتظامیہ کو اپنے تحفظات سے آگاہ کرنا چاہیے تھا۔