پشاور خود کش دھماکا، حملہ آوروں کا اسلام سے کوئی تعلق نہیں، پاکستان سے جنگ کرنے والوں کو صفحہ ہستی سے مٹادیں گے: وزیر اعظم

اسلام آباد: وزیراعظم شہباز شریف نے کہا ہے کہ پاکستان کے خلاف جنگ کرنے والوں کو صفحہ ہستی سے مٹا دیں گے۔اللہ کے گھر کو نشانہ بنانا ثبوت ہے کہ حملہ آوروں کا سلام سے کوئی تعلق نہیں۔

پولیس لائنز پشاور کی مسجد میں خودکش حملے کی سخت مذمت کرتے وزیراعظم نے  کہا کہ اللہ تعالی کے حضور سربسجود مسلمانوں کا بہیمانہ قتل قرآنی تعلیمات کے منافی ہے۔ دہشت گرد پاکستان کے دفاع کا فرض نبھانے والوں کو نشانہ بنا کر خوف پیدا کرنا چاہتے ہیں۔

وزیراعظم نے کہا کہ پاکستان کے خلاف جنگ کرنے والوں کو صفحہ ہستی سے مٹا دیں گے۔ شہریوں کا ناحق خون بہانے والوں کو عبرت کا نشان بنائیں گے۔ وزیراعظم نے اپنے بیان میں مزید کہا کہ دہشت گردی کے خاتمے کے لیے پوری قوم اور ادارے یکسو اور متحد ہیں۔ قوم اپنے شہدا کو سلام عقیدت پیش کرتی ہے۔

انہوں نے کہا کہ خیبرپختونخوا میں امن وامان کی بگڑتی صورت حال پر جامع حکمت عملی اپنائیں گے۔ وفاق صوبوں کی انسداد دہشت گردی کی صلاحیت بڑھانے میں تعاون کرے گا۔