چیئرمین سینیٹ سے چینی سفیر کی ملاقات، باہمی دلچسپی کے امور پر تبادلہ خیال

11

اسلام آباد: چیئرمین سینیٹ صادق سنجرانی سے چینی سفیر نونگ رونگ کی ملاقات ، دوطرفہ تعلقات سمیت باہمی دلچسپی کے امور پر تبادلہ خیال کیا گیا ۔

 

تفصیلات کے مطابق ملاقات میں باہمی مفاد کیلئے مختلف شعبوں میں دوطرفہ تعاون کو مزید فروغ دینے کے عزم کا اعادہ بھی کیا گیا ۔ دونوں ممالک نے خطے میں امن ، خوشحالی اور ترقی کے فروغ کیلئے اجتماعی کوششوں کی ضرورت پر زور دیا ۔

 

اس موقع پر صادق سنجرانی نے کہا کہ دونوں حقیقی دوست ہر طرح کے حالات میں ایک دوسرے کے ساتھ کھڑے رہے ، ہم چینی قومی مفاد کے بنیادی امور ون چائنہ پالیسی ، تائیوان ، تبت اور ہانگ کانگ کی حمایت کرتے ہیں ۔ انہوں نے جموں و کشمیر تنازع اور ایف اے ٹی ایف پر چین کی حمایت کی تعریف ۔

 

چیئرمین سینیٹ نے کہا کہ پاک چین اقتصادی راہداری منصوبے کی بروقت تکمیل کیلئے پُرعزم ہیں ۔ پاک چین اقتصادی راہدای کے مخالف عناصر کامیاب نہیں ہوں گے ۔ انہوں نے کہا کہ حکومت ملک میں چینی شہریوں کی حفاظت کیلئے تمام اقدامات کر رہی ہے ۔

 

صادق سنجرانی نے کہا کہ پاکستان کو تائیوان کی صورتحال پر گہری تشویش ہے ۔ تائیوان کا مسئلہ سنگین ہونے کی صورت میں علاقائی امن اور استحکام متاثر ہونے کا خطرہ ہے ۔ یوکرین اور دیگر خطوں میں جاری تنازعات کے بعد دنیا ایک اور بحران کی متحمل نہیں ہو سکتی ۔ نیا تنازعہ پیدا ہوا تو اس کے عالمی امن ، سلامتی اور معیشت پر منفی اثرات مرتب ہوں گے ۔

 

چینی سفیرنونگ رونگ نے کہا کہ چین کے تجربات پاکستان کی سماجی اور معاشی خوشحالی میں معاون ثابت ہوں گے ۔ پاکستان چین کا قریبی دوست ہے ، اسلیے چین دوطرفہ تعاون مزید مستحکم کرنے کا خواہاں ہے ۔ چین علاقائی امن کیلئے اپنی جدوجہد جاری رکھے گا ۔

 

 

تبصرے بند ہیں.