علیم خان نے جہانگیر ترین گروپ میں شامل ہونے کا فیصلہ کر لیا

لاہور: پاکستان تحریک انصاف (پی ٹی آئی) کے رہنماءعلیم خان نے جہانگیر ترین گروپ میں شامل ہونے کا فیصلہ کر لیا ہے اور آج وہ جہانگیر ترین کے گھر ہونے والے عشائیہ میں اس کا باقاعدہ اعلان کریں گے۔ 
تفصیلات کے مطابق متحدہ اپوزیشن کی جانب سے ممکنہ تحریک عدم اعتماد کے اعلان کے بعد حکومت، اپوزیشن اور اتحادی جماعتیں تو متحرک ہیں ہی مگر اس ساری صورتحال میں پی ٹی آئی کے ناراض رہنماﺅں کیساتھ ساتھ آزاد ارکان کی اہمیت بھی بڑھ گئی ہے اور تمام جماعتوں نے اپنے رابطے تیز کر دئیے ہیں۔ 
پی ٹی آئی کے ترین گروپ نے آج لاہور میں جہانگیر ترین کی رہائش گاہ پر اہم مشاورتی اجلاس طلب کر رکھا ہے جس میں جہانگیر ترین لندن سے ویڈیو لنک کے ذریعے شرکت کریں گے۔ ذرائع کا کہنا ہے کہ صوبائی وزیر علیم خان نے بھی جہانگیر ترین گروپ میں شامل ہونے کا فیصلہ کر لیا ہے اور اس حوالے سے دونوں کے درمیان ٹیلی فونک رابطے میں معاملات بھی طے پا گئے ہیں۔ 
ذرائع کے مطابق علیم خان آج جہانگیر ترین کی رہائش گاہ پر ہونے والے عشائیہ میں اپنی شمولیت کا باقاعدہ اعلان کریں گے جبکہ آئندہ چند دنوں میں علیم خان کے دوست ارکان اسمبلی اور پارٹی رہنماءبھی ان کے ساتھ ترین گروپ میں شریک ہو جائیں گے۔ 
اجلاس میں ترین گروپ کے ارکان عدم اعتماد کی تحریک آنے کی صورت میں اپنی حکمت عملی کا جائزہ لیں گے، اور پی ٹی آئی کے مزید ناراض ارکان سے رابطوں کا جائزہ لیا جائے گا، جبکہ پنجاب اور مرکز کے حوالے سے اپنی حکمت عملی کے حوالے سے تجاویز پر بھی غور کیا جائے گا۔