پارٹی اور اتحادی جماعتوں کا وزیر اعظم عمران خان پر مکمل اعتماد ہے، گورنر پنجاب

لاہور: گورنر پنجاب چودھری سرور نے کہا کہ اپوزیشن کے نمبرز پورے ہونگے نہ ہی ان کا حکومت ہٹاؤ مشن کامیاب ہوگا، پارٹی اور اتحادی جماعتوں کا وزیر اعظم عمران خان پر مکمل اعتماد ہے۔

گورنر پنجاب سے پارٹی وفود نے ملاقاتیں کیں اور اس موقع پر چودھری سرور کا کہنا تھا کہ اقتدار سے آؤٹ اپوزیشن سن لیں کپتان آج بھی ڈٹ کے کھڑا ہے جبکہ اپوزیشن خواب ہی دیکھتے رہ جائے گی اور 2023 کا الیکشن آجائے گا۔ ان کا مزید کہنا تھا کہ عوام نے تحریک انصاف کی حکومت کو پانچ سال حکومت کا مینڈ یٹ دیا ہے اور وزیر اعظم عمران خان پہلے سیاسی مخالفین سے بلیک میل ہوئے نہ اب ہونگے جبکہ اپوزیشن احتجاجی سیاست کی بجائے عام انتخابات کا صبر سے انتظار کرے۔

چودھری سرور نے کہا کہ ملک میں یکساں ترقی حکومت کا مشن ہے اور عوام کو بھی خوشحال مضبوط بنائیں گے، موجودہ حکومت ملک کو درست سمت میں ڈالنے کی پالیسی پر گامزن ہے اور صحت کارڈ پاکستان کی تاریخی منصوبہ ہے، حکومت عوام کیساتھ کھڑی ہے۔