بلدیاتی انتخابات میں شکست ، پی ٹی آئی رہنما آپس میں اختلافات کا شکار

49

پشاور: خیبر پختونخواہ کے بلدیاتی انتخابات کے بعد میئر پشاور کی نشست کھوجانے پر پی ٹی آئی رہنماؤں کے آپسی اختلافات بڑھ گئے ۔ وزیراعظم کے معاون خصوصی ارباب شہزاد کے بھتیجے ارباب محمد علی نے گورنر کے پی شاہ فرمان کے احتساب کا مطالبہ کر دیا ہے۔

تفصیلات کے مطابق ارباب محمد علی نے کہا کہ وزیراعظم سے اپیل ہے کہ گورنر خیبر پختونخوا شاہ فرمان کا احتساب کیا جائے، شاہ فرمان کی ذاتی انا اور مفاد کے باعث پارٹی پہلے بھی صوبائی اسمبلی کی دو نشستیں ہار چکی ہے۔ ان کا کہنا تھا کہ میئر کے لیے پی ٹی آئی کا امیدوار رضوان بنگش امپورٹڈ تھا، رضوان بنگش پیراشوٹ کے ذریعے گورنر شاہ فرمان اور ان کے حواریوں کی تجوریاں بھر کر میئر بننے کا خواب دیکھ رہا تھا۔

ان کا کہنا تھا کہ لوگوں نے میئر کی نشست کے لیے امپورٹڈ امیدوار کو مسترد کر دیا۔

یاد رہے کہ ارباب محمد علی نے پشاور میئر نشست کی ٹکٹ کے لیے پی ٹی آئی کو درخواست بھی دی تھی۔ارباب محمد علی 2013 ٹاؤن تھری کے سابق ناظم رہ چکے ہیں اور ان کے بھائی ارباب شیر علی پی ٹی آئی کے رکن قومی اسمبلی ہیں ۔

تبصرے بند ہیں.