پاکستان کی قندھار کی مسجد میں دہشتگردانہ حملے کی شدید مذمت

103

اسلام آباد:پاکستان نے افغان صوبے قندھار میں مسجد پر دہشت گردانہ حملے کی شدید الفاظ میں مذمت کی ہے۔

ترجمان دفتر خارجہ عاصم افتخار کی طرف سے جاری کردہ بیان کے مطابق پاکستان نے افغانستان کے صوبہ قندھار کی مسجد میں نماز جمعہ کے دوران خود کش بم دھماکے کی مذمت کرتے ہوئے کہا کہ حملے میں بہت سی قیمتی جانیں ضائع جبکہ کئی افراد زخمی ہوئے جس پر پاکستانی حکومت اور عوام افغان عوام سے تعزیت کرتے ہیں۔

ترجمان دفتر خارجہ کا مزید کہنا تھا کہ دکھ کی اس گھڑی میں پاکستان افغان عوام کے ساتھ ہے جبکہ پاکستان ہر قسم کی دہشتگردانہ کارروائیوں کی پر زور مذمت کرتا ہے۔

خیال رہے کہ آج افغانستان کے صوبے قندھار میں نماز جمعہ کے دوران مسجد کے اندر خودکش بمبار نے دھماکے سےخود کو اڑا دیا جس کے نتیجے میں 41 افراد جاں بحق اور 70 زخمی ہو گئے۔

میڈیا رپورٹس کے مطابق قندھار کی بی بی فاطمہ مسجد کو اس وقت خودکش بمباروں نے نشانہ بنایا جب لوگ نماز جمعہ کی تیاری کر رہے تھے۔ عینی شاہدین کے مطابق یکے بعددیگرے تین دھماکے ہوئے ،ایک دھماکہ مسجد کے دروازے پر، دوسرا وضو خانےمیں اور تیسرا دھماکہ نمازیوں کے درمیان ہوا۔

دھماکے میں جاں بحق ہونے والوں اور زخمیوں کو میر واعظ ہسپتال منتقل کیا گیا ہے جہاں کئی زخمیوں کی حالت تشویشناک بتائی جاتی ہے۔

یاد رہے کہ گزشتہ جمعے کو قندوز میں بھی ایک مسجد کو نشانہ بنایا گیا تھا جس میں کم از کم 55افراد جاں بحق اور سو سے زائد زخمی ہو گئے تھے۔

تبصرے بند ہیں.