میرا امریکا میں علاج کرایا جائے، عمر شریف کی دکھی دل کیساتھ وزیراعظم عمران خان سے اپیل  

230

کراچی: پاکستان کے لیجنڈ کامیڈین عمر شریف نے وزیراعظم عمران خان سے اپیل کی ہے کہ وہ ان کا علاج امریکا سے کرائیں کیونکہ وہاں ہیلتھ کی بہتر سہولتیں موجود ہیں۔

عمر شریف نے اپنے خصوصی ویڈیو پیغام میں اپیل کی کہ ڈاکٹروں کا کہنا ہے کہ مجھے بہتر علاج معالجے کیلئے بیرون ملک جانا چاہیے۔ ان کا کہنا تھا کہ میری قسمت میں جتنا لکھا تھا میں نے وزیراعظم عمران خان کے شوکت خانم ہسپتال بنانے میں مدد کی۔ اب ڈاکٹرز نے مجھے مشورہ دیا ہے کہ میرا بہتر علاج امریکا میں ہو سکتا ہے

لیجنڈ کامیڈٰین نے کہا کہ میں وزیراعظم عمران خان سے مخاطب ہو کر انھیں کہنا چاہتا ہوں کہ آپ نے جب بھی مجھے فون کیا، میں نے ہمیشہ آپ کی آواز پر لبیک کہا، اس لئے مجھے یقین ہے کہ اب آپ بھی میری اپیل کو ضرور سنیں گے۔

خیال رہے کہ گزشتہ دنوں عمر شریف کے انتقال کی جھوٹی خبریں سوشل میڈیا پر وائرل ہونے کے بعد ان کے اہلخانہ نے سخت غصے کا اظہار کرتے ہوئے کہا تھا کہ وہ بالکل خیریت ہیں۔ صارفین کو بغیر تصدیق کے ایسی نیوز کو آگے نہیں پھیلانا چاہیے۔

سماجی رابطوں کی معروف ویب سائٹس فیس بک، یوٹیوب اور ٹویٹر پر یہ جعلی خبریں اور ویڈیوز چلنا شروع ہو گئی تھیں کہ لیجنڈ کامیڈین کا انتقال ہو گیا ہے۔

ان سوشل میڈیا پوسٹس میں ناصرف عمر شریف کے انتقال پر افسوس کا اظہار کیا گیا بلکہ پاکستانیوں سے درخواست کی گئی کہ مرحوم کی مغفرت کیلئے خصوصی دعائیں کی جائیں۔

ان خبروں کے سامنے آتے ہی لوگوں نے بغیر تصدیق کئے انھیں آگے پھیلانا شروع کر دیا، جس کے بعد دیکھتے ہی دیکھتے یہ پوسٹس وائرل ہو گئیں۔

جس شخص نے بھی سوشل میڈیا پر یہ خبر پڑھی اس پر کمنٹس کرکے افسوس کا اظہار کیا اور اپنی پوسٹ پر شیئر کردیا۔ فیس بک کے ساتھ ساتھ یہی حال ٹویٹر صارفین کا بھی رہا، وہاں بھی دھڑا دھڑ اس افواہ اور جعلی خبر کو شیئر کیا جاتا رہا۔

بعد ازاں عمر شریف کے اہلخانہ نے ان جھوٹی خبروں پر سخت غصے کا اظہار کرتے ہوئے کہا کہ لوگ کیسے بغیر تصدیق کئے ایسی باتیں آگے پھیلانا شروع کر دیتے ہیں۔ لوگوں کے اس رویے سے ہمیں شدید دکھ پہنچا ہے۔

عمر شریف کے صاحبزادے جاوید نے میڈیا سے گفتگو میں کہا کہ سوشل میڈیا پر زیر گردش خبریں جھوٹ کا پلندہ ہیں۔

کچھ عرصہ قبل کامیڈین عمر شریف کی ایک فوٹو وائرل ہوئی تھی، جس میں وہ بیماری کی حالت میں ایک ویل چیئر پر بیٹھے ہوئے ہیں۔

اس فوٹو کو ٹویٹر اکاؤنٹ سے شیئر کرتے ہوئے عمر شریف کی صحتیابی کیلئے دعاؤں کی درخواست کی گئی تھی۔ عمر شریف کے اہلخانہ کا کہنا تھا کہ یہ تصویر کچھ عرصہ قبل لی گئی تھی جب انھیں خرابی صحت کی وجہ سے ہسپتال لے کر جانا پڑا تھا۔

تبصرے بند ہیں.