چین کا پاکستان سے متعلقہ محکموں میں سیکورٹی بڑھانے کا مطالبہ

اسلام آباد: چین نے پاکستان سے متعلقہ محکموں سے موثر سیکورٹی کے انتظامات کا مطالبہ کردیا ۔

تفصیلات کے مطابق  پاکستان میں چینی سفارتخانے نے گوادر میں گزشتہ روز دہشتگردی کے واقعے کی شدید مذمت کرتے ہوئے  پاکستان کے تمام متعلقہ محکموں سے  مؤثر سکیورٹی کے لیے مؤثر عملی اقدامات اٹھانے کا مطالبہ کیا ہے۔

چینی سفارتخانے کی جانب سے جاری بیان میں کہا گیا ہےکہ گوادار ایکسپریس وے منصوبے پر چینی عملے کے موٹر قافلے پر خودکش حملہ کیا گیا جس میں ایک چینی زخمی، دو مقامی بچے جاں بحق اور کئی زخمی ہوئے۔

اعلامیے میں کہا گیا ہےکہ پاکستان میں چینی سفارت خانہ گوادر میں دہشتگردی کی کارروائی کی مذمت، دونوں ممالک کے زخمی افراد سے ہمدردی اور جاں بحق ہونے والوں پر تعزیت کا اظہار کرتا ہے۔

اعلامیے میں مزید کہا گیاہے کہ پاکستان سے مطالبہ کرتے ہیں کہ زخمیوں کو مکمل طبی امداد دی جائے اور پاکستان خود کش دھماکے کی مکمل تحقیقات کرکے مجرموں کو سخت سزا دے۔

چینی سفارتخانے کی جانب سے کہا گیاہےکہ پاکستان کے تمام متعلقہ محکمے مؤثر سکیورٹی کے لیے مؤثر عملی اقدامات اٹھائیں، پاکستان سکیورٹی تعاون کا طریقہ اپ گریڈ کرے تاکہ یقینی بنایاجائےکہ آئندہ ایسے واقعات پیش نہ آئیں ۔

پولیس کے مطابق گوادر ایکسپریس وے پرحملے کا مقدمہ نامعلوم دہشتگردوں کے خلاف درج کیاگیا جس میں قتل ،اقدام قتل، دھماکا خیز مواد اور دہشتگردی کی دفعات شامل ہیں۔

واضح رہےکہ بلوچستان کے ساحلی شہر گوادر میں چینی شہریوں کے قافلے پر حملہ کیا گیا جس کے نتیجے میں ایک چینی شہری بھی زخمی ہوا جب کہ تین بچے جاں بحق ہوئے۔